اعتزلت الاعلام بسبب عبدالعزيز وترى حريم أولادها جياكر
حصة اللوغاني: أنا ربيت ولغيري صفيت!!
حوار في الستين حوار فنتازي مرح نلتقي من خلاله مع نجم او نجمة من النجوم ممثلين او مطربين او اعلاميين نتخيل انهم وصلوا لسن الستين ونجري معهم حوارا خفيفا نتخيل فيه كيف ستكون حياتهم بعد ان دخلوا خريف العمر ولاضفاء مزيد من الكوميديا الساخرة للموضوع قام زميلنا شريف محمد مستخدما فن الجرافيك بتخيل هيئة هؤلاء الفنانين والاعلاميين بعد ان دخلوا عصر الستينيات في صورة قد تكون صدمة لهؤلاء النجوم وعشاقهم من محبيهم وجسدنا ذلك في الحوار التالي نلتقي بالمذيعة الجميلة حصة اللوغاني:
شخبارج حجية حصة؟
- والله تمام وعلى قولتهم يا الله الجنة
وشتسوين الحين؟
- شسوي قاعدة مقابلة سجادتي ومصحفي ومقابلة احفادي وعيالي يسيرون علي وياحريمهم وامسك عيالهم اذا اشنغلوا.
وليس ما تطلعين؟
- حاشتني حالة نفسية من عقب ما كنت حلوة ما ابي الناس تشوفني بهالشكل.
- بس انتي للحين حلوة؟
- حلو آه.. وين ايام قبل شنو كنت وشنو صرت ولما اقول للناس انا حصة اللوغاني ما يصدقوني.
ليش ما تسوين تجميل؟
- وييه ما سويت ايام شبابي اسوي الحين خلاص رادت علي باخذ زماني وزمان غيري.
تذكرين ايام قبل لما كنتي مشهورة؟
- اتذكر اكيد ايام ما كنت اقدم برنامج بنات وبس واستريح وعقب بنات وبس قدمت حريم وبس ولو فيني شدة الحين كان ممكن اقدم برنامج عجايز وبس انا متخصصة في سلسلة برامج «بس».
متى اعتزلتي الاعلام والاضواء؟
- فجأة لما جاني حفيدي عبدالعزيز وكان ماسك في ايده صورة لي وسألني صدق هذه انتي ولا واحدة تانية فاستحيت منه وقلت اذا كان حفيدي مو مصدق فشلون الناس.. فقررت الاعتزال.
عيالك وين يشتغلون؟
- عندي حمد طبيب اسنان متقاعد وحسين مهندس ويوسف طيار واصغر عيالي هو فواز ولكنه فاشل ما كمل دراسته وتزوج مبكر من اجنبية وهي اللي قاعدة تصرف عليه.
ما شاء الله كل عيالك اصبيان؟
- لا عندي بنت كادي الله يخليها كل يوم عندي هي وريلها وعيالها.
ليش بنتك كادي ما صارت مذيعة؟
- كادي صارت دكتورة وانا ما بيها تدش المجال الاعلامي لانها حلوة وايد واخاف عليها.
انتي بعد كنتي حلوة وبالرغم من ذلك دخلتي الاعلام؟
- الله يرحمهم امي وابوي كانوا يخافون عليَّ وايد وياما قالولي لا دشي هالمجال لكني ما سمعت كلامهم اما كادي سمعت كلامي.
تفتقدي للشهرة والنجومية الحين؟
- وانا صغيرة ما كنت اسعى وراء الشهرة والنجومية جاءتني على طبق من فضة بس لما جربت حلاوتها حبيتها ويكفيني ان الناس للحين تذكرني بالخير.
تشوفين زملاء القدامى في «تلفزيون الوطن» وشخبارهم؟
- ايمان نجم ما شاء الله عليها مستمرة للحين ونجمها ساطع ومحمد المساعيد اعتزل بعد فوضة ولا موضة لان حياته كلها صارت فوضة والحين بيتعالج في امريكا من هذه الفوضة الله يشفيه.
وعبدالله دشتي قام يبيع برد بعد ما سوى زمان تقرير عن البرد حب ها المهنة وايد وحاطت مقابل بيته عربانة يبيع فيها البرد.
وبسام العثمان تزوج على مرته واحدة اجنبية «فيها شيء ملفت» وعايش معها في خليج المكسيك ولما ندق عليه ما يرد.
وشخبار مدير «تلفزيون الوطن» احمد الدوغجي؟
- وييه شخباري انا سمعت انه فتح قناة بروحه بيقدم برنامج شلون تكون شخص هادي وما تعصب.
وشخبار البرديوسر مناف العوضي؟
- مناف مسكين سافر امريكا من سنين وده يزرع شعر في سكسوكته من كتر ما نتفها.
تشوفين بشار الشطي؟
- والله من زمان ما شفته خبري فيه انه مهاجر في امريكا مع ولده يعقوب ويقولون انه ما يبي يرد الكويت.
تسمعين الاغاني؟
- اسمع اغاني اول اغاني النجوم الكبار بشار الشطي وطبعا النجم العالمي مشعل الشايع وايضا احمد حسين فهؤلاء صنعوا تاريخ الاغنية الكويتية.
ومن الجيل الحالي تسمعين من؟
- ما سمع احد اغاني هالايام ما لها علاقة بالطرب حتى لو كانت اغنية مثل «ما حب المشروم» اللي كسرت الدنيا.
شلون حريم عيالك معك؟
- لا تذكرني بهم عيالي خذوهم بدون رضاي وكلهم ما فيهم خير، ولا انا كنت اطبخ واسوي واعدل واسنع وكاني قاعدة اشيل عيالهم ماكو فايدة «انا ربيت ولغيري صفيت».
يمكن تغارين منهم لأنهم احلى منك؟
- والله ما شافوا الحلا وكلهم جياكر ماشافوني ايام شبابي كانوا عرفوا عدل شنو الحلاوة والجمال.
شنو تاكلين الحين وانتي بهالعمر؟
- والله عايشة على الخبز والجبن الابيض عشان القولون خاصة اني اعاني من الضغط والسكر وكل شيء ممنوع اكله.
السبت أكتوبر 18, 2008 5:11 am